Giorgio Pinna

giorgio pinna

Nato a Pozzomaggiore il 2 dicembre 1902, Giorgio Pinna è considerato uno dei maggiori poeti in lingua sarda del ‘900. Al suo attivo ha una vasta produzione poetica nella quale  ritroviamo la sua gente, le bellezze della natura e le realtà, spesso aspre, della campagna. La sua opera, con la biografia, è stata pubblicata dalle Edizioni 3T in due volumi con il titolo “Cantigos de ajanìa”.
E’ morto a Pozzomaggiore il 15 gennaio 1970.
In suo onore il Comune di Pozzomaggiore ha istituito nel 2004 un Premio di poesia sarda a lui dedicato.

Littera Perdida

Ello goi a pilu isoltu
Pianghes Diana mia?
E pro unu ‘asu ebbia
Isclamas chi t’hapo moltu?

Cando l’hapo connotta
Fît bella chi pariat una santa:
Pomposa totta canta
Cun d’una fronte serena e devota;
E mi nesit s’idea
Ande si m’istimat cussa dea!

Fît alta, fît galana,
Fît superba passende in bighinadu,
E deo li hapo nadu:
— Bonasera, simpatica Diana —
Ma issa hat prosighidu
Faghinde finta de non m’haer bidu.

Restesi zegamente,
De’ cussa giovanedda innamoradu:
Su visu delicadu,
Pariat un’isteddu risplendente:
E-i sas brundas trizzas
Penetraian in coro che frizzas!

Fìt già sa una dada
E deo ancora solu in domo mia:
In s’inferru paria
Pensend’a-i cussa santa immaculada,
E a s’offesa fatta
Mentres chi passaiat in sa piatta.

Pro cumbinascione
Connoschia una ‘ezza tessidora,
E pensei in cuss’ora
De li partecipare sa rajone;
D’infattis avviadu
Mi so, che da-e mere cumandadu.

Ecco chi caminende
M’est bennida s’idea ‘e mi firmare,
Cun tristura pensende
Comente mi podia cumportare,
Ca bi cheriat arte
Deo matessi a mi fagher sa parte!

M’incamino de nou
Fin’a cantu arriv’a su giannile,
Cun s’idea gentile
De cumpiangher su dolore sou
Dapoi, pius a tardu,
Nde dia faeddare in riguardu…

Tando, prim’ ‘e intrare
Bussei sa gianna onestamente,
E issa gentilmente
Da’ intro mi rispondet: — avanzare;
Mentres intrende fia,
Li nesi: — Bonasera, cara tia! —

Rispostu hat bonasera
Allegramente — appenas so intradu,
E cun bona manera
Chi mi essera sezzidu m’hat nadu:
Leo una banchitta
E mi sezzei cun s’anim’afflitta.

Sardigna mia

Olvida s’ira funesta,
Sardigna mia istimada,
Faghe ch’in dogni contrada
Torret sa paghe, sa festa.

Faghe ch’in dogni cuile,
Poberu siat o riccu,
Sonet sa corra, a repiccu,
Si cagliet dogni fusile.

E dormat a sonn’isoltu
Onzi pastore cun s’ ‘ama,
Onzi fizu, donzi mama
Non piangat unu moltu.

Sardigna, su saltu tou
Si ‘estat torra de trigos,
Nemigos contr’a nemigos
Non fettan fogu de nou.

Ma giuren subra su fogu
Sas manos insambenadas,
Chi pro sempre sun torradas
Sas dies de disaogu.

E da-e sos montes pedrosos
Falen tottu sos bandidos,
Perdonados e pentidos,
Umiles e rispettosos.

Sardigna mia, ses tue
Terra ‘e nobiles incantos,
De meraculosos Santos
Invocados in tottue.

Sardigna, Sardigna mia,
Fizastra male trattada,
Pianghe disisperada
Sa seculare orfania.